المنحوس منحوس

المنحوس منحوس لو علقوا على راسه فانوس

كلمة بنقولها دايما بس ما اعتقدش ان في حد عاشها بنفس اللي عشته فيها

حالة نحس غريبة مسكتني من 3 أسابيع ..... و ما ادراك لما تنحس مع الواحد

اعوذ بالله بجد ... الواحد بيبقى مش طايق نفسه لما يحس إن في حاجة غلط ما يعرفش ايه هي

نخش في الموضوع

بداية الموجة كانت من 3 أسابيع تقريبا و انا راجع أكتوبر وقعت مني 50 جنيه .. ما اخدتش في بالي

قولت خدت الشر و راااحت ... عادي بتحصل كتير و مش هتأثر كتير

نفس الأسبوع و انا مروح البلد في الشرقية .. يوم الجمعة .. لما وصلت البيت إكتشفت ان المحفظة

مش موجودة معايا ...شكيت إني أكون نسيتها في اكتوبر .. اتصلت بصاحبي قلب الدنيا عليها ما لقاهاش

دورت في البيت برضه يمكن حد من الشياطين الحمر ( ولاد اخواتي ) قلبها مني و ضربها في جيبه

ما لقيتهاش .. قولت شكلها وقعت .. طبعا انا اتخنقت قوي كده الموضوع بقى غير عادي

و المصيبة ان المحفظة و ما ادراك ما المحفظة ....خد عندك شوية من اللي كانوا فيها

البطاقة .. كارنيه الكلية .. رخصة القيادة .. 3 بطاقات إئتمان منهم واحدة بتاعت والدتي .

صور شخصية للأسرة و الأصدقاء و الأهل و خالوا صلاح و ... آسف افتكرت نفسي باعمل اهداء

كروت شخصية لناس من الوزن التقيل و ايصال دفع مصاريف الترم و الجدول و حاجات كتير.. شنطة على بابا من الأخر

غير الفلوس .. حوالي 400 جنيه .. قولت هي وقعت مني .. و استنى ابن الحلال اللي يتصل بيا يقول

انا لقيت محفظتك و ياخد اللي فيه النصيب ... و لا حياة لمن تنادي .. طبعا انا متكتف و كان في أجازات

لا عرفت اوقف الفيزا و لا اعمل مذكرة فقد .. نحس نحس نحس ...

و عملت حسابي على 150 جنيه مستريح بدل فاقد من كل اللي وقع مني .. بعدها بيومين جالي تليفون من اخويا

بيقولي المحفظة ظهرت .. و ظهورها ده ليه قصة مش وقتها دلوقتي خالص .. المهم انها وصلتني لحد الصيدلية

و مافيهاش الفلووس ... قولت قدر الله و ما شاء فعل ..

طبعا اتضايقت و دمي اتحرق كتير اللي بيحصل .. لحد يوم الأربع اللي فات ..

نزلت مع واحد صاحبي صيدلة القاهرة كان في هناك مؤتمر حضرته و قابلت بقية الغجر نزلنا معاهم سيتي ستار

و اكلنا في مطعم في شارع النزهة جنب دار الدفاع الجوي .. المهم اخر اليوم و انا مروح اكتشفت ان الموبايل وقع

ادور و اتصل مافييييييش ... اقف هنا شوية .. كده في حاجات غلط مش حاجة واحدة ...

طبعا الموبايل لوحده كارثة تانية .. هو مش غالي من الأساس بس الأرقام و الرسايل اللي عليه .. و شوية

أدلة تودي نص الجمهورية في المعتقلات و غياهب السجون .. لو اتنشرت هتلاقي تاني يوم بالبنط العريض

خرج فلان و لم يعد .. إختفاء فلان في ظروف غامضة .. هتشوف من ده كتير ما تقلقش

و بألتمس حسن النية و إبتسامة من الأذن اليمنى للأذن اليسرى ..

طبعا الموبايل لو كان هيرجع ما كانش اتقفل والباقي معروف .. اتصلت عشان اوقف الخط بعدها بيومين

و لو حد سأل يومين ليه ؟ لعل و عسى اللي لاقاه نفسه يعمل مكالمة اعرف اجيبه .. مافيش

المهم اتصل بالشركة و هي فودافون .. بيتأكد من البيانات .. صعقني بجد

الخط بتاعي .. علبته معايا .. العقد معايا ... كل ما يثبت ان الخط بتاعي موجود معايا ..

بس طلع بإسم واحدة ... يااااااااااااااااااارب ... ارحمني برحمتك

خبطت مشوار لحد ميدان سفنكس و روحت هناك عدلت البيانات و الغلط من الموزع ... عملت استبدال شريحة

تاني يوم تستمر موجة النحس مع توقع سقوط عواصف رعدية على أوضتي انا بالذات .. منحوس بقى

النضارة الشمس وقعت .. خير خير خير اللي ييجي في الريش بقشيييييييش

لحد كده و الحمد لله مافيش حاجة حصلت

كنت بأفكر اقعد في بيتنا و اقول كفاية علام و ادور على اللي هتستتني .. بس خفت لأجيب النحس ليها

قعدت مع نفسي شوية أراجع تصرفاتي .. اللي بيحصل ده سببه ايه ؟

هل غضب من ربنا نازل عليا .. بيخلص في الدنيا .. قعدت ادور و أخد رأي الناس المقربين ..

ما جبتش سيرة حد .. ما غلتطش في حق حد .. إتضايقت أكتر ..

لو إكتشغت اني غلطان في حق حد او ارتكبت ذنب .. بأمانة كنت هاستريح

بس للأمانة أنا اتعلمت جامد من الحوارات اللي مرت عليا دي ...

أتأكد ان كل حاجة معايا .. و لو حد قالك انت شكاك حط اللي في رجلك في بقه ..

او ركبه على حمار بالمقلوب و اعمله زفة في صلاح سالم او طريق النصر ... او قدام سيتي ستار و اعمل تذاكر عليه

اللي هيقولك شكاك لا هيرجعلك المحفظة و لا الموبايل و لا الفلوس و لا النضارة ..

هتقولي فلتقل خيرا أو لتصمت .. ده يتقال لما اكون في مشكلة و باحلها .. لكن دي حاجة شخصية

مافيش حد هيتأذي منها إلا صاحب الحاجة ...

اتعلمت كذا حاجة .. أتأكد ان الحاجة كلها معايا . مرة و اتنين

ما اشيلش اكتر من 50 جنيه في جيبي و الباقي يترمي في الفيزا و ماكينات الصرف الالي مافيش اكتر منها

حاجات كتير تعمل حسابك فيها

بس انا بأسأل نفسي

سؤال يطرح نفسه على الساحة .. بعد إنحسار موجة النحس الحمد لله

في ركووووود ... صمت ... الهوا واقف .. مافيش نسمة بتعدي

هل ده الهدوء اللي بيسبق العاصفة

كلي فضول و ترقب ...

في مقولة إنجليزية ترجمتها الحرفية بتقول

عار علي أن أخدعك مرة .. و عار عليك أن أخدعك مرتين

يعني لو ضحكت عليك مرة واحدة عيب في حقي .. لكن لو ضحكت عليك مرتين .. دي عيب في حقك انت

انا انطبقت عليا المقولة دي بنسبة 400 %

يا ترى هل ؟؟؟؟؟؟ هو ده السؤال